Hotel Fljótshlíð

Vörur frá bænum

Beint frá býli er samvinnuverkefni um sölu afurða beint frá býli bóndans á Íslandi. Að verkefninu standa Hólaskóli, Lifandi landbúnaður, Ferðaþjónusta bænda, Landbúnaðarháskóli Íslands, Bændasamtök Íslands og Impra.

Smáratún er einn af stofnfélögum Beint frá býli og því geta gestir Smáratúns fengið að njóta ýmissa afurða sem unnar eru á býlinu. Sem dæmi um slíkar afurðir eru sultur unnar úr rifsberjum, sólberjum, krækiberjum eða rabbabara. Brauð og flatkökur sem eru bökuð heima og kindakæfur, unnar með aldagamalli aðferð. Að Smáratúni eru íslenskar landnámshænur og eggin eru ýmist borin fram á morgunverðarhlaðborði eða nýtt til matargerðar. Kartöflur og gulrófur eru ræktaðar á býlinu og allt nautakjöt sem er á boðstólum í Smáratúni er frá býlinu.   

Ýmsar vörur frá okkur, til dæmis okkar vinsælu taðreyktu hrossabjúgu, eru einnig seldar hjá Frú Laugu í Reykjavík og í Fjallkonunni sælkerahúsi á Selfossi.